Gjendje e qëndrueshme për adoleshentin e aksidentuar – tre viktimat dërgohen për autopsi
Adoleshenti që mbijetoi aksidentin tragjik të djeshëm ndodhet në gjendje të qëndrueshme shëndetësore dhe po trajtohet në kushte shtëpie, bëjnë të ditur nga Spitali Klinik i Tetovës.
Trupat e tre viktimave të aksidentit janë dërguar në Institutin e Mjekësisë Ligjore në Shkup, ku do t’u nënshtrohen autopsisë. Më pas, trupat do t’u dorëzohen familjarëve për ceremonitë e varrimit.
Sipas informacioneve zyrtare nga Sektori për Punë të Brendshme në Tetovë, aksidenti ndodhi si pasojë e humbjes së kontrollit nga drejtuesi i automjetit tip Opel Astra. Pamjet e siguruara nga kamerat e sigurisë sugjerojnë se shoferi mund të ketë pësuar sulm në zemër, por konfirmimi përfundimtar pritet nga raportet mjeko-ligjore dhe prokuroria.
Nga SPB Tetovë bëjnë të ditur se, që nga fillimi i vitit 2025, tetë persona kanë humbur jetën si pasojë e aksidenteve rrugore në rajonin që mbulojnë. E njëjta shifër e viktimave ishte regjistruar edhe gjatë vitit 2024.
