Ibrahimi: E zgjidhëm problemin 40-vjeçar të Medresesë “Isa Beu”
Pas dekadash pritjeje dhe pas një angazhimi të gjatë politik, Qeveria e Republikës së Maqedonisë së Veriut ka miratuar sot Ligjin për shkollat e mesme fetare, duke zgjidhur një nga padrejtësitë më të mëdha ndaj nxënësve të Medresesë “Isa Beu”, mosnjohjen zyrtare të diplomave të tyre.
Kryetari i Alternativës dhe njëherësh një nga liderët e koalicionit VLEN, Zeqirija Ibrahimi, e cilësoi miratimin e ligjit si rezultat i një “përpjekjeje vetëmohuese dhe të sinqertë”, që i jep fund një padrejtësie 40-vjeçare.
“Urime nxënësve të kësaj shkolle dhe falënderime për të gjithë që kanë kontribuar për këtë sukses. Le ta gëzojnë nxënësit dhe prindërit e tyre!”, shkroi Ibrahimi në rrjetet sociale, duke e shoqëruar statusin me një ajet nga Kurani: “Cilat dhunti të Zotit tuaj po i mohoni?!” (Er-Rrahman).
Medreseja “Isa Beu”, një institucion arsimor me rëndësi historike dhe shpirtërore për komunitetin mysliman në vend, kishte për dekada të tëra një status të pazgjidhur ligjor që vinte në pikëpyetje vlefshmërinë e diplomave të saj në sistemin shtetëror. Me miratimin e ligjit të ri, këto diploma do të njihen zyrtarisht dhe do të hapin rrugën për qasje të barabartë në arsim të lartë dhe në tregun e punës për dhjetëra gjenerata të nxënësve.
Ky vendim shihet si një hap i rëndësishëm drejt barazisë arsimore dhe respektimit të të drejtave të komuniteteve fetare në vend, ndërkohë që vjen në një moment kyç për koalicionin VLEN, i cili ka marrë mbi supe zgjidhjen e çështjeve të neglizhuara ndër vite.
Ky zhvillim pritet të mirëpritet gjerësisht si nga komuniteti mysliman, ashtu edhe nga mbrojtësit e të drejtave të njeriut dhe të barazisë në arsim.
