John Duncan në Hagë: Kadri Veseli ishte një nga njerëzit me funksion të lartë të zbulimit

Ish-këshilltari i gjeneralit Wesley Clark, britaniku John Stewart Duncan, ka dëshmuar sot sërish para gjykates seciale në Hagë, ku po zhvillohet procesi kundër ish-krerëve të Ushtrisë Çlirimtare të Kosovës. Gjatë seancës, prokuroria i ka prezantuar Duncan-it një fotografi nga viti 1999, duke e pyetur nëse e njeh personin në qendër të saj. Ai ka deklaruar se nuk e di emrin, por e njeh figurën. “Nuk e di emrin e tij, por e di kush është. Me sa më kujtohet, ishte një nga njerëzit me funksion të lartë, në funksionin policor dhe të zbulimit”, tha Duncan, pa dhënë më shumë hollësi mbi burimin e njohurive të tij. Kur u pyet nëse kishte arsye të kundërshtonte identifikimin e personit si Kadri Veseli, Duncan tha se “nuk ka arsye”. I pyetur po ashtu për praninë e Xhavit Halitit në të njëjtën fotografi, Duncan kërkoi që seanca të kalojë në pjesë private, duke theksuar se nuk ishte i sigurt nëse mund të përgjigjej publikisht. Dëshmia e Duncan vjen pas rrëfimeve të tjera të rëndësishme ndërkombëtare, ndërsa mbrojtja e Thaçit dhe ish-drejtuesve të tjerë të UÇK-së po përpiqet të sfidojë narrativën e prokurorisë mbi strukturat dhe rolin e tyre gjatë luftës në Kosovë.