Kasami: Tetova bëhet komuna e parë me platformë të unifikuar digjitale
Kandidati i VLEN për kryetar të komunës së Tetovës, Bilall Kasami, ka prezantuar Platformën e Unifikuar Digjitale të Tetovës “TE KLIK”, e cila tashmë është e disponueshme për përdoruesit në iOS dhe Android.
Sipas Kasamit, kjo platformë do t’u ofrojë qytetarëve qasje të shpejtë dhe të lehtë në të gjitha shërbimet komunale, duke rritur transparencën dhe duke lehtësuar funksionimin e përditshëm.
“Për herë të parë, qytetarët do të mund të paguajnë parkimin online përmes aplikacionit, të shohin vendparkimet e lira, si dhe informacione për kohën e lirimit të parkimit. Po ashtu, aplikacioni ofron shërbime të shumta të lidhura me pronën – përfshirë pagesën e tatimit në pronë online, gjenerimin e fletëpagesave dhe qasjen në informacione të tjera mbi pronësinë,” u shpreh Kasami.
Ai theksoi se Tetova është komuna e parë në nivel republikan që ofron një sistem inovativ dhe unik të këtij lloji.
“Kështu, hap pas hapi, po krijojmë Tetovën moderne, europiane dhe digjitale – një qytet të fokusuar në transparencë, llogaridhënie dhe në hap me kohën,” shtoi kandidati i VLEN. (INA)
