“Kirilit dhe Metodit” 29 projekte, UT-së vetëm 1, FNA pyet: A i diskriminon MASH-i universitetet shqiptare?
Forumi për Ndryshim Arsimor informoi për projektet-hulumtuese që Ministria e Arsimit dhe Shkencës ka zgjedhur të i financojë. Prej gjithsej 40 projekteve, nga FNA thonë se 29 i janë ndarë Universitetit “Shën Kirili dhe Metodi” ndërsa prej 3 universiteteve shqiptare, vetëm 1 projekt i është ndarë Universitetit të Tetovës, transmeton Portalb.mk.
“Gjithashtu, kërkojmë që edhe vetë universitetet që funksionojnë në gjuhën shqipe si: Universiteti i Tetovës, Universiteti “Nënë Tereza” dhe Universiteti i Evropës Juglindore të reagojnë publikisht nëse projektet e tyre nuk janë pranuar apo, në të kundërtën, bëhet fjalë për paaftësi nga ana e tyre për të shkruar dhe aplikuar me projekte në MASh”, thonë nga FNA.
FNA publikisht pyet MASh-in: 29 nga 40 hulumtime që MASh-i do të financojë shkojnë te Universiteti “Shën Kirili dhe Metodi”, ndërsa nga 3 universitetet që funksionojnë në gjuhën shqipe, vetëm 1 projekt i është ndarë Universitetit të Tetovës. Shumë pak projekte kanë marrë edhe universitetet tjera publike. FNA-ja ngre pyetje publike: a është kjo për shkak të mungesës së kapaciteteve të universiteteve për të aplikuar, apo për diskriminim institucional në shpërndarjen e fondeve publike?
Kujtojmë se nga Forumi për Ndryshime në Arsim së fundmi kritikoi masën e ndarjes së laptopëve për studentët në kohë zgjedhjes. Sipas tyre, kjo masë e Qeverisë ngjason në një politikë populiste sepse procedurat për zbatimin e saj nisin në periudhën e fushatës së zgjedhjeve lokale, dhe se është politikë shkurtpamëse sepse me 250 euro, laptopët që mund të blihen apo mjetet tjera elektronike janë me performanca shumë të dobët.
