Klubi i Boksit Shkëndija, organizon turneun “Nata e Kampionëve”
Për të 12 herë në Tetovë, nesër pritet të mbahet turneu i madh ndërkombëtar në boks, Nata e Kampionëve, që organizohet nga klubi i Boksit Shkëndija – no Limit në Tetovë. Do të marrin pjesë boksierë nga rajoni, Evropa dhe disa shtete të botës, ndërsa do të garohet për marrje titujsh, por edhe për pikë plus në ranglistën e Boksierëve profesionistë në botë. Nga Tetova, do të garojnë dy boksierët Lulzim Ismaili, dhe Leonard Abazi, të cilët garojnë për rang më të mirë në listën botërore të boksierëve, ndërsa në Boksin e rangut botëror, do të jetë i mirënjohur Xhetan Keta, anëtar i familjes KETA që historikisht ka nxjerrë boksier shqiptarë ndër më të mirët. Ngjarja do të jetë në Sheshin Iliria në Tetovë, ndërsa përveç boksit, do ofrohet edhe një spektakël i vërtetë me këngëtar botëror, si dhe boksi ekzibicionist, që do jetë nga këngëtari dhe boksieri i njohur botërisht Emanuelsen.
“Normal që do jem para shqiptarëve të mi dhe kjo ka tjetër peshë dhe duhet ti nderoj me fitore. Unë gjithnjë luftërat i bëj të vërteta dhe jap maksimumin, kështu që jam fokusuar për nesër vetëm tek ringu dhe kundërshtari”, deklaroi Xhetan Keta, boksier.
“Ka gati një muaj që e kemi analizuar kundërshtarin kemi punuar me trajnerin sepse është një kundërshtar i fortë dhe fitorja do na fut në top 100 andaj, patjetër duhet të jap maksimumin që ta fitoj”, u shpreh Lulzim Ismaili, boksier. /Bashkim Sulejmani