Kosova nën rrethim spiunësh – nga Serbia te Rusia e Kina; Eksperti austriak: Prishtina në frontin e një Lufte të Ftohtë të re
Prokuroria e Qarkut në Split njoftoi më 28 gusht se pas pranimit të kallëzimit penal nga Sektori i Pavarur për çështje të policisë ushtarake, ka nisur hetimet kundër një shtetasi të Kroacisë (i lindur më 1971) dhe një shtetaseje të Serbisë (e lindur më 1979), për veprën penale të spiunazhit.
Sipas njoftimit, Prokuroria ka caktuar fshehtësinë e plotë të procedurës, me arsyetimin se publikimi i të dhënave mund të dëmtojë zhvillimin e hetimeve.
Sipas burimeve të mediave kroate, dyshohet se piloti kroat, i angazhuar në misionin paqeruajtës të NATO-s në Kosovë (KFOR), i ka dhënë informacione konfidenciale partneres së tij, e cila më pas ua ka përcjellë anëtarëve të Listës Serbe. Ky rast ka nxitur reagime të forta dhe ka vënë në pah rrezikun e spiunazhit ndaj Kosovës.
Fehlinger: Prishtina po kthehet në “kryeqytet të spiunazhit”
Eksperti austriak, Gunther Fehlinger, në një prononcim për “Bota sot”, tha se rasti tregon se Prishtina po i ngjan kryeqyteteve të spiunazhit, duke e krahasuar me Vjenën e viteve 1950.
“Fatkeqësisht, Prishtina e vitit 2025 i ngjan kryeqytetit të spiunazhit, ashtu siç ishte Vjena në vitet 1950. Që nga viti 2022, Kosova përballet me një lloj të ri Lufte të Ftohtë me Serbinë, ndërsa Rusia zhvillon luftë të hapur kundër Ukrainës dhe aleatëve tanë.
Ashtu si Vjena dikur, Prishtina sot është kryeqyteti i një shteti në vijën e parë të frontit, me status të pasigurt, i mbrojtur nga SHBA-të, por ende pa qenë anëtar i plotë i NATO-s. Këto zona gri dhe pa status të qartë tërheqin spiunët. Kosova duhet të jetë vigjilente dhe të reagojë me vendosmëri ndaj aktiviteteve të agjentëve nga Serbia, Rusia, Irani dhe Kina,” – u shpreh ai.
“Çështjen ta trajtojë Kroacia, Kosova të ruajë aleancat”
Fehlinger tha se rasti i pilotit kroat dhe partneres së tij duhet t’i lihet në duar autoriteteve kroate.
“Rekomandoj që çështja t’i lihet autoriteteve kroate dhe të ndiqet një qasje e përmbajtur. Kroacia është aleate dhe partnere kyçe në përballjen me kërcënimin serb, dhe Kosova ka nevojë për marrëdhënie të forta me të.
Është më e mençur që kjo çështje të trajtohet me diskrecion, duke mbajtur profil të ulët. Fokusimi duhet të mbetet te kërcënimet nga Serbia, Rusia, Irani dhe Kina – dhe miqtë tanë kroatë le t’i trajtojnë rastet e tilla në mënyrën e duhur,” – përfundoi eksperti austriak.(Bota Sot)
