Kriza me KSHZ-në: BDI dhe ASh akuzojnë qeverinë për vendim antishqiptar, VLEN akuzon BDI-në

Vendimi i Komisionit Shtetëror Zgjedhor (KSHZ) për uljen e numrit të këshilltarëve në komunat shqiptare ka nxitur reagime të ashpra nga partitë politike shqiptare, të cilat e cilësojnë si vendim antikushtetues dhe diskriminues, shkruan Flaka Media

BDI: Mbivotim etnik, rikthim në kohën e Millosheviçit

Nga BDI thonë se vendimi është precedent i rrezikshëm që kthen vendin pas.
“Ky vendim nuk është vetëm i dëmshëm politikisht për shqiptarët, por është edhe precedent i rrezikshëm që kthen vendin në kohën e Millosheviçit dhe Rrahman Morinës, kur vullneti i shqiptarëve injorohej dhe shkelej sistematikisht. Sot, megjithëse Kushtetuta është e qartë dhe ekziston vendim i Gjykatës Kushtetuese, ata përsëri shkelën çdo normë juridike dhe demokratike,” thuhet në reagimin e BDI-së.

Sipas kësaj partie, komunat shqiptare janë dëmtuar drejtpërdrejt: në Gostivar numri i këshilltarëve bie nga 31 në 23, ndërsa në Strugë, Kërçovë, Vrapçisht, Zhelinë dhe Tearcë, për nga 4 këshilltarë më pak.

ASh – krahu i Arben Taravarit: VLEN në shërbim të Mickoskit

Nga Aleanca për Shqiptarët e Arben Taravarit u drejtuan akuza të forta ndaj qeverisë dhe VLEN-it.
“Situata është e qartë: VLEN-i është pajtuar me pretendimet e Mickoskit për të rrënuar çdo gjë shqiptare. Madje, anëtari i tyre në KSHZ, Abdush Demiri, mungoi në seancën vendimtare për fatin e mërgatës dhe të komunave shqiptare. Kjo manovër nuk kalon te shqiptarët. Tetori është afër dhe verdikti i shqiptarëve do të jetë fatal për këtë grupim të izoluar,” thuhet në reagim.

ASh – krahu i Ziadin Selës: Do ta ankimojmë vendimin

Nga krahu tjetër i Aleancës, ai i Ziadin Selës, paralajmërojnë veprime ligjore.
“Vendimi i KSHZ-së për zvogëlimin e numrit të këshilltarëve është antikushtetues. Ftojmë Gjykatën Administrative të hedhë poshtë vendimin, pasi bie ndesh me Kushtetutën, Kodin Zgjedhor dhe Ligjin për Vetëqeverisje Lokale. Nëse kjo nuk ndodh, do ta ankimojmë në Gjykatë Kushtetuese. Çdo tentim për të organizuar zgjedhje mbi këtë bazë antikushtetuese rrezikon të gjithë procesin zgjedhor dhe sjell pasoja penale për anëtarët e KSHZ-së,” thuhet në reagim.

VLEN: BDI ka fshirë diasporën shqiptare

Ndërkohë, nga VLEN thonë se përgjegjësinë për diskriminimin e shqiptarëve e mban vetë BDI.
“Qeveria e BDI-së në vitin 2021 e fshiu diasporën shqiptare me regjistrimin e popullsisë. Ata shkruan, propozuan dhe votuan modelin që përjashtoi diasporën dhe dëmtoi përfaqësimin shqiptar. Ali Ahmeti, Bujar Osmani, Artan Grubi dhe të tjerët janë krijuesit e problemit. Ata u bënë milionerë, ndërsa shqiptarët u fshinë nga regjistrimi. Mesazhi është i qartë: BDI nuk mund ta zgjidhë një problem që e ka krijuar vetë,” thuhet në reagimin e VLEN-it. Flaka Media