Kryetari i Gostivarit, Valbon Limani: “Liria e mediave është liri e demokracisë”

Kryetari i Komunës së Gostivarit, Valbon Limani, ka reaguar pas presioneve ndaj mediave, duke theksuar se liria e të shprehurit është thelbësore për një shoqëri demokratike.

“Liria e të shprehurit në media është kyçe për demokratizimin e shoqërisë, zhvillimin dhe inkurajimin e mendimit kritik. Është absolutisht e palejueshme që individë dhe institucione të abuzojnë me fuqinë e tyre dhe të kërcënojnë një liri të tillë”, deklaroi Limani.

Ai nënvizoi se institucionet kanë detyrim që jo vetëm ta respektojnë punën gazetareske, por edhe të krijojnë kushte për funksionimin pa pengesa të mediave.

“Mbështetje të plotë për ekipin e TetovaSot. Ne të gjithë jemi përgjegjës për të ndihmuar dhe mbështetur mediat që ta bëjnë punën e tyre pa probleme, të liruar nga çdo lloj presioni. Liria e mediave do të thotë liri e demokracisë”, theksoi kryetari i Gostivarit.

Në fund, Limani u bëri thirrje gazetarëve të qëndrojnë të palëkundur përballë presioneve:
“Të nderuar gazetarë të TetovaSot, mos lejoni të zmbrapseni nga fuqia e individëve dhe grupeve, ju keni fuqinë më të madhe!” Flaka Media