KSHZ, gati për zgjedhjet në afatin e paraparë
Nënkryetari i KSHZ-së, Abdush Demiri gjatë intervistës në Alsat-M ka thënë KSHZ është e përgatitur që të realizojë zgjedhjet në bazë të programit dhe afatit të paraparë.
Sipas tij, tentativa për ndryshime në Kodin zgjedhor ishte e dështuar.
“Një ditë pas dështimit të tentativës së këtillë, KSHZ mbajti seancë me të cilën atë ditë fillonte dhe procedura e parashikuar në nenin 63 i cili është në fuqi që të fillojë, që të legjitimohen propozuesit e kandidaturave të pavarura, pra është një procedurë që duhet respektuar në përputhje me nenin 63 të Kodit zgjedhor”, tha ai.
E di një gjë, shprehet ai se nuk do të ketë efekt retrospektiv që të kthehet procedura përsëri, pasi jemi në fazën e realizimit të veprimeve zgjedhore që ato të mbahen në datën e caktuar.
Ndërkohë, sa u takon rekomandimeve nga OSBE/ODIHR në drejtim të ingerencave që ka KSHZ, sipas tij KSHZ ka vepruar në këtë drejtim.
“Dy nga rekomandimet që vlerësojmë se janë të rëndësishme janë zgjedhja e sekretarit të përgjithshëm të KSHZ-së, pasi nuk ka pasur përpara një pozitë të tillë dhe në një nga seancat të cilat i patëm miratuam edhe procesverbalin nr. 16, ku thjeshtësuam formën që ta kenë më të lehtë këshillat zgjedhor për të mbushur procesverbalet gjatë ditës së zgjedhjeve”, ka thënë Demiri.
