Kur do të fillojë të zbatohet “Safe City” në Tetovë dhe Kumanovë?
Shefja e Sektorit për Çështje të Trafikut në Ministrinë e Punëve të Brendshme, Maja Arsovska-Manov, në një paraqitje në TV Telma, deklaroi se sistemi elektronik “Safe City” aktualisht funksionon në të gjithë territorin e Qytetit të Shkupit, dhe deri në fund të dhjetorit do të aktivizohet edhe në Kumanovë dhe Tetovë.
Ajo shpjegoi se ky është një sistem plotësisht i aktivizuar për zbulimin automatik të shkeljeve të trafikut, i cili siç tha, tashmë po jep rezultate në Shkup.
“Deri në fund të këtij muaji, planifikojmë ta vëmë në funksion në Kumanovë dhe Tetovë, dhe nga viti i ardhshëm i njëjti sistem do të zbatohet në territorin e të gjithë vendit”, tha Arsovska Manov.
Sipas MPB-së, pajisjet janë instaluar edhe në Korridoret 8 dhe 10, dhe regjistrimi automatik i shkeljeve të trafikut në këto rrugë kritike pritet të fillojë në çdo moment.
Ajo gjithashtu theksoi më tej se aktualisht nuk ka statistika të përgjithshme për aksidentet ose shkeljet, pasi çdo ditë nga qytetarët merren raportime.
“Nuk mundëm të bënim llogaritje menjëherë. Ndërsa qytetarët raportojnë defekte dhe keqfunksionime në sistemin e kamerave, ekipet dalin menjëherë dhe i rregullojnë ato. Periudha është e shkurtër që ne të dalim me statistika dhe të themi se është mirë, po zvogëlohet, duhet kohë”, shton Arsovska-Manov.
