”Ky nuk është ndryshim, por mashtrim” – Selmani kundër idesë së VLEN-it për nxënësit
Nafie Selmani ka reaguar ashpër ndaj propozimit të Muhamed Elmazit nga radhët e VLEN-it për shpërblimin e nxënësve me patentë shofer. Ajo e ka quajtur këtë ide një absurditet të pastër, të denjë vetëm për propagandën e atyre që në publik e shesin veten si bartës të “ndryshimit”.
“Kjo nuk durohet. Nuk është as për të qeshur, as për të qarë. Është një manifest i pastër absurditeti, që vetëm ideatorët e ‘NDRYSHIMIT’ të VLEN-it mund ta shesin si një ide të madhe,” tha Selmani.
Ajo pyet publikisht se cili është mesazhi që po u jepet të rinjve me një shpërblim të tillë.
“Çfarë i duhet një nxënësi që sapo ka mbaruar shkollën patenta e shoferit? Çfarë mesazhi po u jepni të rinjve? Që suksesi dhe dijenia lidhen me timonin e veturës dhe shpenzimet shtesë?” theksoi Selmani.
Në vend të kësaj, sipas saj, shpërblimet duhet të lidhen me arsimin dhe zhvillimin personal.
“Nëse vërtet doni të shpërbleni dijen, dhurojani bursat, udhëtimet edukative, sportin, artin!” shtoi ajo.
Selmani sugjeroi se një alternativë shumë më e shëndetshme dhe e dobishme do të ishte shpërndarja e biçikletave për nxënësit.
“Ose pse, për shembull, nuk tregoheni më miqësorë me mjedisin jetësor? Në vend të patentave, pse nuk u dhuroni nxënësve biçikleta? Do të ishte më shëndetshme, më arsimuese dhe mbi të gjitha më e dobishme për një të ardhme ekologjike dhe të pastër,” tha ajo.
Por sipas Selmanit, arsyeja e kësaj zgjedhjeje është e qartë: “Ju e dini shumë mirë se keni shkatërruar gjithçka dhe nuk keni lënë as edhe një pëllëmbë toke të lirë për shtigje biçikletash. Prandaj, patenta është zgjidhja ‘më e lehtë’… më e lehtë për ju, jo për të rinjtë.”
Duke e përmbyllur reagimin e saj, Selmani ishte e prerë: “Ky nuk është ndryshim. Ky është mashtrim. S’VLEN!” Flaka Media
