La Zvicrën për atdheun, Mustaf Veseli hartuesi i programit “Komuna Evropiane 2025-2033” që synon një komunë me vizion evropian
Mustaf Veseli, nga Likova, pas një kohe të gjatë jetese, studimesh dhe angazhimi profesional në Zvicër, vendosi të kthehet në vendlindje për të dhënë kontributin e tij në zhvillimin lokal dhe integrimin evropian.
Sot ai mban pozicionin e koordinatorit nacional për bashkëpunim rajonal dhe integrime evropiane. Veseli vijon studimet e doktoratës në Universitetin e Lozanës dhe është i njohur për aktivitetet e tij si afarist dhe pjesëtar aktiv i shoqërisë civile.
Vitin e kaluar, ai u angazhua si koordinator i Lëvizjes Demokratike për Komunën e Likovës dhe hartoi programin zhvillimor “Komuna Evropiane 2025-2033”, që synon transformimin e komunës në një model evropian të zhvillimit bashkëkohor.
Ai përmes një porosie thekson përkushtimin dhe vendosmërinë e tij për ta çuar përpara vizionin “Komuna Evropiane 2025-2033”.
Komuna Evropiane 2025-2033» ka program të qartë zhvillimor, i cili do të shpaloset me oficializimin e kandidaturave nga VLEN.
Atë ditë të kandidimit tim (pa kushtëzime) e kam përgatitur përgjatë rrugëtimit-formimit tim intelektual dhe «idenë e kthimit» sado që sociologu Bourdieu me analizat e tij mbi shoqërinë kabile të Algjerisë e «konfirmonte» si një mit, unë, personalisht e kam MISION dhe këtë po e konfirmoj.
Për këtë mision, kthim mbrapa nuk ka sepse kjo popullatë meriton ndryshimin në përditshmërinë e vet.
Diaspora nuk investon vetëm me franga dhe euro, diaspora sot investon me ideal, përkushtim dhe kthim në vendlindje për ta bërë vendin evropian”, ka porositur Mustaf Veseli, që është djali i veprimtarit të njohur të arsimit në rajonin e Likovës dhe Kumanovës, Feti Veseli. (INA)
