Lamine Jamal fut në sherr Paris Sen Zhermenin dhe Barcelonën
Enrik Masip, këshilltar i presidentit të Barcelonës, Zhoan Laporta dhe anëtar i Komisionit Sportiv të këtij klubi, konfirmoi në një intervistë për “El Chiringuito” lajmin për një ofertë prej më shumë se 200 milionë euro që Paris Sen Zhermeni ia ka bërë më herët gjatë verës për xhevahirin e akademisë së klubit, Lamine Jamal.
“Presidenti e ka thënë vetë se kishte një ofertë prej 200 milionësh që e refuzoi dhe se nuk e mori parasysh kurrë, ishte nga Franca”, tha ai përpara se të linte vulën e tij.
Kur u pyet nëse Lamine ishte “zëvendësuesi i përsosur” për Kilian Mbape në Paris, Masip buzëqeshi dhe pohoi me kokë.
“Epo, kur ke para dhe ke një mënyrë për të paguar, mund të shpresosh të provosh të nënshkruash gjithçka”.
Pas kësaj deklarate të lëshuar nga krahu i djathtë i presidentit të Barcelonës ka ardhur dhe reagimi nga Franca. Sipas “Mundo Deportivo”, Paris Sen Zhermeni ka hedhur kategorikisht poshtë pretendime të tilla se i ka ofruar 200 milionë euro Barcelonës për shërbimet e Jamal.
