Mbape dërgon një sinjal të fortë, pasi që zëvëndësohet ndaj Marsejës
Në “El Clasico” mes Olimpik Marsejës dhe PSZH-së, e fituar 2-0 nga parizienët, u shfaq edhe një herë Kilian Mbapé, i zëvendësuar në pjesën e dytë, kur skuadra e Luis Enrikes po fitonte minimalisht. Sulmuesi, i mërzitur nga zëvendësimi, shkoi në pankinë me fytyrë të vrerosur, megjithëse trajneri asturian përsëriti në konferencë për shtyp se vendimet e tij synojnë “të kërkojë më të mirën për ekipin” dhe se, për më tepër, ai është “lodhur” duke u shpjeguar gjithmonë për të njëjtën gjë (zëvendësimet e Mbappe).
Më pas, në Instagram, Mbape ka postuar një foto që ka bërë bujë në rrjetet sociale. Në një imazh, në të cilin shihet nga pas, me shirit në krah, në shi, në momentin e zëvendësimit, kapiteni i skuadrës franceze tregoi trishtimin e dukshëm, qoftë për shkak të zëvendësimit, qoftë sepse e diela ishte e fundit “El Clasico” ndaj Olympi Marsejës për të, para se të largohet nga PSZH në qershor.
Në 7 ndeshjet e fundit të Ligue 1, Mbappé ka luajtur vetëm njërën prej tyre të plotë, në Montpellier, javën e 26-të, kur shënoi “hat-trik”.
Që kur u konfirmua, përmes një deklarate jozyrtare nga klubi, në mes të shkurtit, se ai nuk do të rinovojë, Luis Enrike e ka “censuruar” në ndeshjet e kampionatit, i vetëdijshëm se herët a vonë, siç ka përsëritur, skuadra duhet të përshtatet për të luajtur pa lojtarin e saj më të mirë.
Ajo që nuk është në diskutim: Mbape nuk do të zëvendësohet në ndeshjet me rëndësi, ku ka tituj në lojë, si të mërkurën kundër Renit, në gjysmëfinalen e Kupës, ose në përballjen e Ligës së Kampionëve kundër Barcelonës, më 10 dhe 16 prill.