Mbështetja për studentët bëhet realitet – Kuvendi Studentor i UNT-së përshëndet ndarjen e vauçerëve prej 250 euro nga shteti

Studentët e Universitetit “Nënë Tereza” në Shkup kanë mirëpritur me entuziazëm vendimin e Qeverisë së Maqedonisë së Veriut për ndarjen e vauçerëve në vlerë prej 250 euro për blerjen e laptopëve, tabletëve apo kompjuterëve, si pjesë e politikave shtetërore për përmirësimin e kushteve të studimit dhe digjitalizimin e arsimit të lartë.

Kjo masë vjen si përmbushje e një premtimi të dhënë në një panel publik të organizuar më 16 dhjetor 2024, ku mori pjesë edhe zëvendëskryeministri Izet Mexhiti. Gjatë atij diskutimi, një nga temat kryesore ishte mbështetja financiare për studentët, përmes instrumenteve konkrete si subvencionet dhe vauçerët për teknologji.

Sot, ky premtim është bërë realitet.

“Si Kryesi e Kuvendit Studentor pranë Universitetit ‘Nënë Tereza’, shprehim mirënjohjen tonë për këtë hap të rëndësishëm në mbështetje të studentëve. Vauçeri prej 250 euro për blerjen e pajisjeve teknologjike është jo vetëm një ndihmë financiare, por edhe një investim në të ardhmen tonë akademike dhe profesionale,” – deklaroi Omer Hebib, kryetar i Kuvendit Studentor.

Sipas tij, kjo politikë përfaqëson një shembull konkret të bashkëpunimit ndërmjet institucioneve shtetërore dhe zërit të studentëve, duke dëshmuar se kur rinia dëgjohet dhe përfshihet në vendimmarrje, ndryshimi është i mundur dhe i prekshëm.

Programi për ndarjen e vauçerëve për pajisje teknologjike është pjesë e një pakete më të gjerë qeveritare, e cila synon të ndihmojë studentët në përballimin e sfidave moderne të studimeve, ku teknologjia luan një rol qendror. Kjo nismë është veçanërisht e rëndësishme për studentët nga familje me të ardhura më të ulëta, për të cilët një pajisje e re mund të jetë vendimtare për vijimin me sukses të studimeve.

Vauçerët janë të vlefshëm në disa dyqane të certifikuara të teknologjisë dhe synojnë të përfshijnë sa më shumë studentë në mënyrë të drejtë dhe transparente.

Nga Kuvendi Studentor theksohet se ky është vetëm një hap, por shumë i rëndësishëm, në drejtim të krijimit të një ambienti më të mirë arsimor dhe zhvillimor për të rinjtë në vend.

“Shpresojmë që çdo qeveri që merr besimin e të rinjve të këtij vendi të vazhdojë të mbështesë me përkushtim iniciativat dhe nevojat e rinisë, e veçanërisht ato studentore,” – shtoi Hebib në deklaratën e tij.

Ky reagim pozitiv nga studentët vjen në një kohë kur gjithnjë e më shumë të rinj kërkojnë nga institucionet përgjegjësi, përfshirje dhe masa konkrete që e bëjnë më të lehtë dhe më efektiv procesin e tyre arsimor.