“Mendi Qyra premton mbështetje konkrete për sportistët e Strugës: Sporti si prioritet për fëmijët dhe komunitetin”
Kandidati i pavarur për kryetar të Strugës, Mendi Qyra, u takua me sportistët e qytetit, ku dëgjoi kërkesat dhe shqetësimet e tyre. Sportistët ngritën problemet e mungesës së infrastrukturës, bursave dhe mbështetjes së nevojshme për talentet lokale, duke kërkuar një qasje më serioze nga pushteti lokal.
Në një njoftim, Qyra theksoi se sporti nuk është vetëm çështje medaljesh, por edhe një element kyç për shëndetin dhe zhvillimin e fëmijëve, duke u zotuar për mbështetje konkrete ndaj komunitetit sportiv strugan.
Më poshtë njoftimi i plotë i Mendi Qyrës:
“Duam një kryetar që do kujdeset për sportin dhe sportistët si baba e jo si njerk.”
“Struga është qytet i sportit, kemi aq shumë talente por edhe shumë zhgënjim.”
“Duam infrastrukturë, fusha e stadiume.”
“Duam bursa dhe mundësi për fëmijët që sjellin medalje në Strugë.”
-Këto ishin vetëm disa nga mesazhet që u dëgjuan sonte në takimin me sportistët e Strugës.
E kush më mirë se vetë sportistët mund të më ndihmojnë në përcaktimin e prioriteteve për sportin në qytetin tonë? Sonte dëgjova shumë zhgënjim e pesimizëm, por mbi të gjitha shumë histori suksesi, sportistë që pavarësisht vështirësive nuk janë ndalur dhe vazhdojnë të ecin përpara. Unë besoj tek struganët, ashtu siç besuam dhe shpallëm dy herë kampion FC Strugën, duke e bërë emrin e qytetit tonë të njohur edhe në garat evropiane.
Me punë e përkushtim, jam i bindur se sporti në Strugë shumë shpejt do të shkëlqejë. Sepse sporti nuk na sjell vetëm medalje e lavdi, klubet sportive janë jetike për rritjen dhe zhvillimin e fëmijëve tanë, si në aspektin shëndetësor, ashtu edhe në atë social.
-Prandaj, mbështetja për sportin nuk është luks, por domosdoshmëri. (INA)
