Mexhiti: Mësimi me një ndërrim-prioriteti kryesor në Çair

Zëvendëskryeministri i parë dhe ministër për mjedis jetësor dhe planifikim hapësinor, si dhe kandidat për kryetar të Komunës së Çairit, z. Izet Mexhiti, sot zhvilloi takim me mësimdhënës nga Komuna e Çairit para të cilëve shpalosi ‘Vizionin për Arsim’ të mandatit të tij të ardhshmëm në krye të Komunës së Çairit.

Në takimin e zhvilluar në Shkollën Fillore “Ismail Qemali”, në Çair, Mexhiti theksoi se për shumë vite, arsimi në Komunën e Çairit ishte i anashkaluar dhe jashtë vëmendjes së qeverisë së kaluar, ndërsa prezantoi projektin më të madh arsimor të mandatit të ardhshëm: kalimin e të gjitha shkollave fillore komunale në mësim me një ndërrim, dhe më tej në mësim tërëditor sipas standardeve evropiane.

‘Sot, po ndërmarrim një kthesë historike me një projekt që synon ta kthejë Çairin në qendër të dijes dhe arsimit modern. Ky projekt është një investim në të ardhmen e fëmijëve, në lehtësimin e jetës së prindërve, në avancimin profesional të mësimdhënësve dhe në përparimin e komunës’ tha Mexhiti.

Gjatë prezantimit të vizionit të tij Mexhiti tha se nxënësit do të mësojnë në ambiente moderne, me orë interaktive, aktivitete shtesë sportive e artistike dhe do të marrin shujtë të ngrohtë e të subvencionuar çdo ditë.

‘Prindërit do të kenë siguri dhe përkrahje, pasi fëmijët e tyre do të qëndrojnë në shkollë deri në ora 16:00, me kujdes të organizuar dhe cilësor ndërsa mësimdhënësit do të përfitojnë nga trajnime bashkëkohore, mjete digjitale dhe programe motivuese për zhvillim profesional dhe përfshirje në projekte ndërkombëtare, tha Mexhiti.

Gjatë mandatit të ardhshëm Mexhiti tha se Komuna do të ketë shkolla të rinovuara, salla sportive dhe një gjeneratë të përgatitur, të shëndetshme dhe të motivuar për të ndërtuar të ardhmen.

Projektin për mësim në vetëm në një ndërrim Mexhiti tha se do ta nisë këtë vit nga SHFK “Kongresi i Manastirit”, si shkollë pilot, dhe do të shtrihet gradualisht në të gjitha nëntë shkollat fillore të Çairit, në bazë të një plani të qartë dhe investimesh të sigurta.

‘Mësimi tërëditor nuk është luks, është standardi minimal që fëmijët tanë meritojnë‘, përfundoi Mexhiti.