Milanoviq pa dorashka: “Shantazhi mes Maqedonisë dhe

Presidenti kroat Zoran Milanoviq, në një takim me homologun e tij bullgar Rumen Radev, tha se çështja midis Maqedonisë dhe Bullgarisë është një çështje e brendshme politike midis dy vendeve, përcjell Telegrafi Maqedoni.
Ai kritikoi qëndrimin ndaj vendeve të Ballkanit Perëndimor në procesin e integrimit evropian.

“Është e qartë se kjo është një hapësirë politike intime si e Bullgarisë, ashtu edhe e bullgarëve, si dhe e maqedonasve. Por pse them se është një çështje e brendshme politike? Qeveria në Maqedoni, e cila erdhi së fundmi, që do të thotë se si presidenti ashtu edhe kryeministri janë nga i njëjti grup politik dhe mbajnë fort pushtetin, padyshim që nuk duan të bëjnë kompromise. Ndërsa vlerësojnë se kjo nuk kërcënon pozicionin e vendit, se është ende e fortë, është vetëm vendimi i tyre. Bullgaria padyshim beson se nuk mund të kalojë nëpër disa gjëra dhe nuk më takon mua të flas për këtë”, tha Milanoviq.
Në një konferencë të përbashkët për shtyp me Radevin, Milanoviq tha se ishte një fyerje për vendet si Mali i Zi dhe Maqedonia e Veriut të thuash se Ukraina është më afër anëtarësimit në Bashkimin Evropian.

“Më duket gjithnjë e më e mundshme që cinizmi dhe vrazhdësia e disa strukturave evropiane janë të pandalshme. Këta njerëz duket se janë të fiksuar pas Ukrainës dhe sikur kjo është mënyra e tyre për të qëndruar në pushtet. Ukraina është një vend në luftë pa një territor të përcaktuar qartë, i cili nuk është në gjendje të financojë veten. Të thuash se Ukraina është më afër anëtarësimit në BE sesa Mali i Zi ose Maqedonia është një fyerje e paturpshme për ato vende. Është e padrejtë dhe çnjerëzore, ne po e shkatërrojmë atë vend”, tha Milanoviq.