Ministria e Ekonomisë dhe Punës shpall thirrje publike për mbështetje financiare të bizneseve dhe zejtarëve
Ministria e Ekonomisë dhe Punës ka shpallur katër thirrje publike për mbështetje financiare të ndërmarrjeve mikro, të vogla dhe të mesme (NVM), zejtarëve dhe kompanive nga industria përpunuese, në kuadër të programeve për zhvillimin e sipërmarrësisë dhe rritjen e konkurrueshmërisë për vitin 2025.
Qëllimi i këtyre thirrjeve është të nxitet sipërmarrësia, të përmirësohen standardet e cilësisë dhe të ndihmohen bizneset në rritjen e pranisë së tyre në treg. Sipas njoftimit zyrtar, mbështetja financiare synon sektorin prodhues, si dhe zejtarët aktivë, me përparësi për rajonet me prodhim të brendshëm bruto më të ulët.
Thirrjet e shpallura përfshijnë:
-
Subvencione për certifikimin ISO të NVM-ve
Bashkëfinancim prej 40% të shpenzimeve për certifikim sipas standardeve ISO, deri në 150.000 denarë për aplikant.
Totali i mjeteve: 1.5 milion denarë.
Afati për aplikim: 30 qershor 2025. -
Mbështetje për certifikimin HALLALL
Financim deri në 40% për shpenzimet e certifikimit HALLALL, gjithashtu me kufi prej 150.000 denarë për aplikant.
Totali i mjeteve: 1.5 milion denarë.
Afati për aplikim: 30 qershor 2025. -
Subvencione për zejtarët për blerje pajisjesh dhe dizajn produkti
Mbështetje deri në 120.000 denarë për blerjen e makinave, veglave ose dizajnin e produkteve të reja.
Totali i mjeteve: 3 milion denarë.
Afati për aplikim: 30 qershor 2025.
Prioritet do t’u jepet aplikantëve nga rajonet më pak të zhvilluara ekonomikisht. -
Financim për zhvillimin e biznesit, produktit dhe tregut
Bashkëfinancim deri në 50% të shpenzimeve (maksimumi 500.000 denarë) për zhvillim të përgjithshëm afarist.
Totali i mjeteve: 5 milion denarë.
Afati për aplikim: deri më 18 korrik 2025 ose deri në shterimin e fondeve sipas parimit “i pari i ardhur, i pari i shërbyer”.
Ministria bën të ditur se të gjitha shpenzimet e mbuluara duhet të jenë realizuar gjatë viteve 2024 dhe 2025, ndërsa aplikantët duhet të përmbushin kushtet e përcaktuara në secilën thirrje.
Për më shumë detaje mbi kriteret, dokumentacionin dhe mënyrën e aplikimit, të interesuarit mund të vizitojnë faqen zyrtare të Ministrisë së Ekonomisë dhe Punës: www.economy.gov.mk.
