Osmani-Mexhiti: FC Shkupi në qendër të fushatës zgjedhore në Çair
Kandidati për kryetar të Komunës së Çairit, Bujar Osmani, ka prezantuar një plan për të shpëtuar FC Shkupin nga kriza. Ai theksoi se largimi i lojtarëve kryesorë, përplasjet mes tifozëve dhe udhëheqjes, si dhe borxhet e mëdha kërkojnë veprime urgjente.
Plani i Osmanit përfshin shqyrtimin ligjor të kontratave të stadiumit, vlerësimin e pronësisë së huaj, menaxhimin transparent të borxheve, krijimin e një kryesie teknike të përkohshme, strukturë të re funksionale dhe fuqizimin e Akademisë për talentet e reja. Ai paralajmëroi gjithashtu angazhimin e investitorëve shqiptarë për një projekt afatgjatë. “Me menaxhim profesional, FC Shkupi do të rikthehet si një nga skuadrat më të forta, duke përfaqësuar denjësisht Çairin dhe shqiptarët në Evropë,” tha Osmani.
Ndërkohë, kandidati i koalicionit VLEN, Izet Mexhiti, e cilësoi FC Shkupin si simbol të përbashkët të qytetit dhe të komunitetit shqiptar, duke theksuar se klubi nuk duhet përdorur për përfitime politike. “FC Shkupi duhet të na bashkojë dhe jo të na ndajë. Mbështetja reale matet me veprime konkrete dhe të vazhdueshme, njësoj siç është dëshmuar kur FC Shkupi është ngritur nga liga e katërt deri në nivelet më të larta të futbollit vendor,” deklaroi Mexhiti.
Të dy kandidatët bien dakord se rikthimi i stabilitetit dhe zhvillimi i klubit janë të domosdoshme, duke e vendosur FC Shkupin në qendër të debatit publik dhe të fushatës zgjedhore në Çair.(INA)
