Pep Guardiola: Man. Siti ka kuptim të madh për mua
Trajneri Pep Guardiola do të jetë në krye të Man. Sitit deri në vitin 2027. 53-vjeçari iu bashkua Man. Sitit në vitin 2016 dhe deri tani, ka fituar 18 trofe, prej tyre gjashtë herë Premier Ligën.
Kontrata e tij skadonte në fund të këtij edicioni, por ai vendosi të vazhdojë me klubin e elitës angleze.
“Man. Siti ka kuptim të madh për mua. Është edicioni i nëntë i imi këtu. Kemi përjetuar shumë gjëra të mira bashkë këtu. Kam ndjenja të veçanta për këtë klub. E kam thënë edhe më herët, këtu kam çdo gjë që një trajner mund të kërkojë dhe këtë e vlerësojë shumë. Shpresoj të fitojmë më shumë trofe. Ky është synimi im”, ka thënë Guardiola.
Pep Guardiola e bëri Man. Sitin vetëm skuadrën e dytë angleze që e fiton “tripletën”, kur triumfoi në Premier Ligën, FA Kupën dhe Ligën e Kampionëve, në të njëjtin edicion.
