Përkujtohen 6 milionë hebrenj/ Vendosen kurora me lule te Monumenti i Holokaustit në Tiranë
TIRANË- Ambasada izraelite në Tiranë së bashku me përfaqësues të qeverisë shqiptare dhe ambasadorin gjerman kanë vendosur kurora me lule në Monumentin e Holokaustit në Tiranë.
Ata përkujtuan gjashtë milionë hebrenj, të cilët humbën jetën gjatë Holokausit. Në nderim të hebrenjve, që humbën jetën gjatë Luftës së Dytë Botërore, morën pjesë edhe përfaqësues nga të gjithë besimet fetare në Shqipëri.
Njoftimi i ambasadës izraelite në Tiranë:
Për të përkujtuar gjashtë milionë hebrenjtë që humbën jetën në Holokaust, Ambasada e Izraelit vendosi kurora në Monumentin e Holokaustit në Tiranë, së bashku me Qeverinë e Shqipërisë, përfaqësuar nga Ministrja e Shtetit për Marrëdhëniet me Parlamentin, Znj. Elisa. Spiropali, ambasadorin gjerman H. E. Z. Karl Bergner dhe kreun e komunitetit Hebre, Z. Amos Dojaka.
Përfaqësues nga të gjithë komunitetet fetare në Shqipëri bënë homazhe për viktimat e Holokaustit.
Sot, me antisemitizmin dhe urrejtjen në rritje në mbarë botën, është thelbësore që të kujtojmë mësimet e së kaluarës dhe të kuptojmë se ku mund të çojë urrejtja. Gjatë Holokaustit, fushatës sistematike për të shfarosur popullsinë hebreje evropiane, gjashtë milionë hebrenj humbën jetën nga duart e nazistëve.
Përkujtimi shërben për të rivendosur dinjitetin dhe drejtësinë për viktimat dhe komunitetin si dhe për të siguruar që bota nuk do të qëndrojë indiferente./ n.m.abcnews.al
