
Policët shqiptarë gjithnjë e më zëshëm kundër degradimit në Ministrinë e Punëve të Brendshme
Gjithnjë e më shumë policë shqiptarë në Maqedoninë e Veriut po guxojnë të flasin hapur për padrejtësitë dhe diskriminimin që përjetojnë brenda Ministrisë së Punëve të Brendshme (MPB). Rasti i fundit është ai i Memet Alimit, polic nga Kumanova, i cili përmes një letre publike ka ngritur shqetësime serioze për trajtimin jo të barabartë të punonjësve shqiptarë në këtë institucion.
Në letrën e tij, Alimi denoncon degradimet e padrejta në detyrë, transferimet selektive pa bazë ligjore, përndjekjen me motive politike e etnike, si dhe nënçmimin e vazhdueshëm moral e profesional ndaj punonjësve shqiptarë. Sipas tij, vendimet për avancim shpesh nuk bazohen në performancë, por në lidhje partiake, duke shkelur parimet e meritokracisë, ligjit dhe Kushtetutës.
“Ky diskriminim i hapur jo vetëm që dëmton moralin e policëve shqiptarë, por cenon edhe funksionimin e shëndoshë të institucioneve të sigurisë në vend,” – thekson Alimi.
Ky reagim shtohet listës në rritje të ankesave publike nga pjesëtarët shqiptarë të policisë, të cilët prej kohësh paralajmërojnë se përballen me mospërfillje, nënçmim dhe pengesa në avancim. Fenomeni po merr gjithnjë e më shumë zë, duke hapur një debat të ri mbi barazinë etnike dhe politike brenda MPB-së.