PSZH gjen zëvëndësimin e Kilian Mbapes te Liverpulli
PSZH po konsideron seriozisht nënshkrimin e Luis Diazit, si pjesë e planeve të tyre të ristrukturimit për verën e ardhshme, me synimin e tyre te anësori kolumbian si një zëvendësues i mundshëm për Kilian Mbapen, sipas raportimeve të fundit.
Që kur mbërriti në Liverpulli, në vitin 2022, Diaz ka lënë një gjurmë të rëndësishme në ekip. Me 22 gola dhe 13 asistime në 86 paraqitje për “The Reds”, sulmuesi i shpejtë ka tërhequr vëmendjen e disa klubeve kryesore në të gjithë Evropën.
Edhe pse thashethemet për një largim të mundshëm kanë qarkulluar, babai i Diazit ka nxitur së fundmi spekulimet duke përmendur interesimin e Real Madridit dhe Atletico Madrid për djalin e tij. Megjithatë, gazetari i njohur i transferimeve Fabrizio Romano ka zbutur shqetësimet për një largim të mundshëm të Diaz, duke këmbëngulur se lojtari është i lumtur dhe i përkushtuar ndaj Liverpullit.
Pavarësisht kësaj, interesimi i Paris Sen Zhermenit për Diazin duket të jetë i vërtetë, veçanërisht si pjesë e planeve të tyre për të gjetur një zëvendësues për Mbapen. Sipas gazetarit të transferimeve, Xhonatan Xhonsonit, Diazi është “definitivisht” në listën e synimeve të PSZH-së për merkaton e ardhshme të verës.
Edhe pse Diaz nuk konsiderohet të jetë një përparësi kryesore për PSZH-në për momentin, shkathtësia dhe talenti i tij e bëjnë atë një opsion tërheqës për klubin francez pasi ata kërkojnë të forcojnë skuadrën e tyre në fusha të ndryshme, duke përfshirë mbrojtjen qendrore dhe mesfushën mbrojtëse.
Me 16 gola dhe 11 asistime në të gjitha garat këtë sezon, Diaz ka dëshmuar vlerën e tij në fushë dhe është subjekt i një konkurrence intensive mes disa klubeve të mëdha. Me afrimin e fundit të sezonit, do të jetë interesante të ndiqen nga afër lëvizjet e Liverpullit dhe PSZH-së, teksa përpiqen të sigurojnë shërbimet e sulmuesit të talentuar kolumbian.