Punëtorët e KOSTT-it protestojnë për rritje pagash: “Kontributi ynë nuk po vlerësohet”
Punëtorët e KOSTT-it kanë dalë sot në protestë para objektit qendror të kësaj kompanie në Prishtinë, për të kërkuar rritje të pagave.
Protesta, e organizuar nga Sindikata e Pavarur e Punëtorëve të KOSTT-it, nisi në orën 10:00 dhe u paralajmërua si një protestë paqësore.
Sipas njoftimit të sindikatës, punëtorët kërkojnë që kërkesa e tyre për rritje të pagave të merret seriozisht, duke theksuar rritjen e kostos së jetesës dhe kontributin e madh që japin në mirëmbajtjen dhe funksionimin e sistemit energjetik të vendit.
“Punëtorët tanë janë shtylla e sistemit energjetik. Meritë e tyre është stabiliteti dhe siguria energjetike. Megjithatë, pagat e tyre nuk pasqyrojnë as barrën, as përgjegjësinë që mbajnë çdo ditë”, thuhet në reagimin e sindikatës.
