Robert Levandovski: Tani është momenti për të mos gabuar
Barcelona mori fitoren e dytë rresht në kampionat, teksa poshti me 3-1 skuadrën e Alaves. Një fitore e rëndësishme kjo për katalanasit që vazhdojnë me rezultatet pozitive. Një nga autorët e golave për blaugranat ishte Robert Levandovski, i cili hapi edhe serinë e golave. Polaku pas ndeshjes do të theksonte se sulmuesit “jetojnë” për të shënuar, megjithatë shtoi se ai vetë nuk e kishte përjetuar keq mungesën e golave për shkak të eksperiencës.
“Për mua si një sulmues është shumë e rëndësishme që të shënoj gola. Kam pasur shumë mundësi, ia dola falë edhe asistimit të Gundogan. Ishte e rëndësishme të fitonim dhe zhvilluam një ndeshje të mirë në të dyja fazat e lojës, si atë mbrojtëse ashtu edhe në atë sulmuese.
Nëse nuk shënon kur mban rolin e sulmuesit është e vështirë, ngarkohesh në aspektin psikologjik. Megjithatë, kur më ndodh të mos shënoj në tre apo katër ndeshje, unë nuk e humbas durimin sepse kam shumë eksperiencë. Kemi edhe tre-katër muaj deri në fundin e sezonit dhe tani është momenti për të mos gabuar, duhet të punojmë dhe të përmirësohemi sepse kemi kualitet”, u shpreh Levandovski
