Sadiku: Uji i Llojanit dhe i Vaksincës është toksik dhe i rrezikshëm për shëndetin, komuna po hesht

Para disa ditësh morëm mostra të ujit në shkollën fillore ndërmjet fshatrave Vaksincë dhe Llojan si dhe një pus në fshatin Llojan, këtë e bëmë pas alarmimit të vazhdueshëm të banorëve dhe prinderëve se uji është i ndotur dhe përmban minerale të rënda.
Ato i dorëzuam në Institutin e Shëndetit Publik për analizë.
Dhe, analizat e ujit tregojnë një nivel alarmant të arsenit: 47.73 µg/L. Ky nivel është gati pesë herë më i lartë se standardi i lejuar ndërkombëtar (i cili ësht10 µg/L).
Për sqarim të opinionit, arseni është substancë shumë toksike që përdoret për prodhimin e pesticideve dhe herbicideve. Gjitashtu është përdorur edhe si helm.
Pra uji i Llojanit dhe i Vaksincës është toksik dhe jashtëzakonisht i rrezikshëm për shëndetin e njeriut, veçanërisht për fëmijët dhe të rinjtë.
Nga ekspertë të fushës së shëndetit publik, na u tha se ekspozimi afatgjatë ndaj nivelit të lartë të arsenit shkakton: Kancer të mushkërive, lëkurës, fshikëzës dhe veshkave, sëmundje të zemrës dhe hipertension, diabet dhe çrregullime neurologjike, vonesa në zhvillimin e fëmijëve dhe probleme të tjera serioze shëndetësore.
Komuna e Likovës mban përgjegjësi direkte për këtë rrezikim të shëndetit publik.
Pavarësisht ankesave të banorëve, nuk është ndërmarrë asnjë masë për të parandaluar helmimin e qytetarëve.
I drejtohem drejtpërdrejt kryetarit të komunës Erkan Arifit:
-Si mund të flini i qetë, ndërsa fëmijët e Llojanit dhe Vaksincës po helmohen çdo ditë ?
-A do të pranonit që fëmijet tuaj ta pijnë këtë ujë?
-Si mund të kërkoni përsëri votën e qytetarëve në Llojan dhe Vaksincës, kur nuk keni ndërmarr asgjë për eliminimin e burimit të arsenit kur partia juaj ka udhëhequr edhe me komunën edhe me Ministrinë e Mjedisit për dy dekada?
Kjo papërgjegjësi rrezikon jetën e banorëve të Llojanit.
Sapo të marrim mandatin, do ta ndalim këtë krim mjedisor dhe rrezikun për shëndetit e banorëve të.kësaj ane.
-Tokën e Llojanit do ta pastrojmë nga arseni.
-Do të sigurojmë ujë të pijshëm sipas standardeve ndërkombëtare.
-Do të garantojmë kontroll të rregullt laboratorik nga institucionet kompetente.
Banorë të Llojanit, Vaksincës dhe të Komunës së Likovës,
Ju keni fuqinë të vendosni: ujë të pastër dhe jetë me dinjitet, apo helmim të përditshëm dhe injorim.
Zgjedhjet në Likovë tashmë janë çështje jetë a vdekje.
Ju faleminderit.