SHBA furnizon FSK-në me dronë të tipit Puma, Kurti: “Më shumë sy në qiell, për më shumë siguri në tokë
Forca e Sigurisë së Kosovës është pajisur me fluturaket pa pilot AeroVironment RQ-20 Puma, të prokuruara nga Shtetet e Bashkuara të Amerikës përmes programit Foreign Military Sale (FMS). Pagesa për këtë sistem ishte realizuar në vitin 2021.
Ministri i Mbrojtjes, Ejup Maqedonci, theksoi se këto pajisje moderne rrisin ndjeshëm aftësitë e FSK-së në fushën e sistemeve ajrore pa pilot, duke fuqizuar kapacitetet mbrojtëse të ushtrisë.
Lajmin e ka përshëndetur edhe kryeministri Albin Kurti, i cili u shpreh:
“Më shumë sy në qiell, për më shumë siguri në tokë. Përgëzime Ministrisë së Mbrojtjes, urime Forcës së Sigurisë së Kosovës dhe mirënjohje Shteteve të Bashkuara të Amerikës.”
Ky zhvillim shihet si një hap i rëndësishëm në thellimin e bashkëpunimit strategjik mes Kosovës dhe SHBA-së në fushën e mbrojtjes. (INA)
