Shtyhet sërish rikthimi i tij në kafaz, MekGregor në gjyq më 5 nëntor
Konor MekGregor, ish-kampioni i dyfishtë i botës në “UFC”, do të paraqitet para një jurie të Gjykatës së Lartë më 5 nëntor. Ai do t’u përgjigjet pretendimeve për sulm të supozuar prej tij, nga një incident në hotelin “Beakon” të Dublinit, në vitin 2018.
Irlandezi duhetj të dilte para gjykatësit në korrik, por asokohe avokatët e “the notorius” arritën të siguronin një shtyrje të seancës, për t’i lejuar MekGregor të rikthehej në kafaz. Ai duhej të duelonte ndaj Majkëll Çendler në “UFC 303” në Las Vegas, por sfida u anullua.
Më pas, MekGregor kërkoi një shtyrje të dytë për një ndeshje boksi të paparalajmëruar, por kjo kërkesë u refuzua, pasi gjykata tashmë i kishte bërë atij një favor. Kjo do të thotë se ai do të detyrohet të shfaqet muajin e ardhshëm në Dublin, megjithëse është e paqartë se sa do të zgjasin procedurat ligjore.
Drejtori ekzekutiv i UFC-së, Dana Uait, e ka bërë tashmë të qartë se MekGregor nuk ka gjasa të bëjë rikthimin e tij në tetëkëndësh deri në fillim të vitit 2025. Kështu, rikthimi i 36-vjeçarit në kafaz apo në ring, siç pretendon ai, do të shtyhet sërish pa afat deri në pranverën e vitit të ardhshëm.