Situata politike, e pashmangshme zëri qytetar – Përfshihen edhe klerikët
Pas deklaratës së kryeministrit Hristijan Mickoski, i cili tha se ai do të vendosë nëse shqiptarët do të jenë në pushtet apo opozitë, kanë ardhur reagime të forta jo vetëm nga politika, por edhe nga klerikët shqiptarë.
Hoxha i Strugës, Shpendi Ibraimi, theksoi se shqiptarët nuk janë numër për t’u manipuluar, por popull me dinjitet dhe të drejtë për të vendosur vetë për fatin e tyre.
“Shqiptarët janë si mali: të fortë, të lartë dhe të pamposhtur. Nuk ka asgjë nga jashtë që mund t’i kontrollojë,” – deklaroi ai.
Në të njëjtën linjë reagoi edhe Hoxhë Bedri Lika, i cili nënvizoi se roli i tij si klerik është mbi partitë politike, por nuk mund të heshtë ndaj gjuhës së Mickoskit.
“Ka kaluar koha e komunizmit. Populli shqiptar janë të zotët e vendit dhe ata përcaktojnë për vetveten,” – theksoi ai, duke shtuar se shqiptarët nuk pranojnë diktime për fatin e tyre.
Këto reagime tregojnë se retorika e kryeministrit ka prekur ndjeshmërinë e gjerë qytetare, përtej politikës, duke përfshirë edhe zërin e klerikëve. Flaka Media
