Sulejmani nga VLEN: Shteti është këtu për ty- Nuk je vetëm
Qeveria përmes Ministrisë së Energjetikës, Minierave dhe Burimeve Minerale ka shpallur masën e re për mbështetje financiare të energjisë elektrike për familjet më të ndjeshme, në vlerë prej gjithsej 42.3 milionë denarësh. Vendimi parashikon një zbritje direkte prej 1.000 denarësh në muaj në faturat e energjisë elektrike, për periudhë njëvjeçare, për amvisëritë ku jetojnë persona me aftësi të kufizuara, persona tërësisht të verbër ose të shurdhër dhe përfitues të kompensimit të veçantë sipas Ligjit për Mbrojtje Sociale.
Zëdhënësi i VLEN-it, Driton Sulejmani, theksoi se ky vendim nuk është thjesht teknik, por bart vlerë humane dhe sociale.
“Sot nuk po ndajmë vetëm një lajm teknik apo një vendim administrativ, sot ndajmë një lajm zemre dhe ndërgjegjeje. Kjo nuk është lëmoshë, por drejtësi sociale. Kjo nuk është propagandë, por vepër konkrete. Kjo është një politikë e humanizmit që i jep kuptim fjalës ‘shtet’,” tha Sulejmani.
Ai shtoi se kjo masë prek drejtpërdrejtë jetën e qytetarëve më të brishtë.
“Ky vendim e prek jetën reale të një nëne që rrit një fëmijë me aftësi të kufizuara, të një pensionisti që jeton me ndihmë sociale, të një qytetari që për dekada është ndjerë i harruar. Ky është një hap modest në vlerë monetare, por shumë i madh në simbolikë. Sepse me këtë themi: ‘Shteti është këtu për ty. Nuk je vetëm’,” u shpreh ai.
Sipas Sulejmanit, energjia nuk është thjesht çështje teknike, por lidhet me jetën dhe solidaritetin shoqëror.
“Energjia nuk është thjesht kilovat. Energjia është jetë. Energjia është siguri. Energjia është solidaritet. Duke e orientuar mbështetjen aty ku dhimbja është më e thellë, ne po krijojmë një sistem ku drita nuk është luks, por e drejtë, dhe ngrohja nuk është privilegj, por domosdoshmëri,” tha ai.
Në fund, Sulejmani u bëri thirrje qytetarëve që të aplikojnë dhe të informojnë ata që mund të përfitojnë nga kjo masë.
“Le të mos mbetet askush pas. Le të jetë kjo një fushatë e përbashkët jo vetëm e qeverisë, por e ndërgjegjes kolektive. VLEN do të vazhdojë të mbështesë politika të tilla me gjithë zemrën dhe kapacitetin institucional. Sepse besojmë se një shoqëri është vërtet e fortë vetëm atëherë kur më i dobëti prej nesh ndihet i mbrojtur,” përfundoi Sulejmani.
