Tensione në Novi Pazar, studentët përplasen me policinë, xhandarmeria ushtron dhunë (VIDEO)
Kriza në Universitetin Shtetëror të Novi Pazarit, qytet me shumicë myslimane në rajonin jugperëndimor të Sanxhakut të Serbisë, është përshkallëzuar ndjeshëm gjatë 48 orëve të fundit, pasi një grup personash të maskuar u futën me forcë në objektin e universitetit për të larguar studentët që prej më shumë se një muaji kishin bllokuar hyrjen në shenjë proteste kundër emërimit të një rektoreje të re, përcjell INA.
Policia serbe, e akuzuar fillimisht se mbrojti grupin e maskuar gjatë ndërhyrjes së natës midis së hënës dhe së martës, u tërhoq mëngjesin e së martës, ndërsa studentët dhe qytetarë vendas u kthyen në ambientet e universitetit. Më vonë gjatë ditës, shpërthyen përleshje fizike mes protestuesve dhe forcave të rendit, duke rezultuar në përdorimin e gazit lotsjellës dhe arrestimin e disa demonstruesve.
Ministria e Brendshme e Serbisë konfirmoi arrestimin e katër personave, ndërsa presidenti i vendit, Aleksandar Vuçiq, paralajmëroi se “arrestimet do të vazhdojnë” dhe se “shteti është më i fortë se çdo grup dhunuesish”. Ai i bëri thirrje komunitetit serb në Novi Pazar të ruajë qetësinë, duke thënë se autoritetet janë në kontroll të situatës.
Protestuesit, të përbërë kryesisht nga studentë dhe staf akademik i universitetit, pretendojnë se emërimi i rektorës Zana Dolicanin është kryer në mënyrë të paligjshme dhe në kundërshtim me statutin e universitetit. Ata thonë se procesi ishte i ndikuar politikisht dhe kërkojnë anulimin e tij, respektimin e autonomisë akademike dhe hetim për ndërhyrjen e dhunshme në objekt.
“Për më shumë se një muaj kemi kërkuar dialog institucional dhe respekt për integritetin e universitetit. Ajo që ndodhi këtë javë është një akt dhune dhe intimidimi,” tha një përfaqësues i studentëve, i cili foli në kushte anonimiteti për shkak të frikës nga ndëshkimi.
Zhvillimet në Novi Pazar kanë ngjallur shqetësim të gjerë në Sanxhak – një rajon i ndjeshëm etnikisht në kufi me Bosnje-Hercegovinën dhe Malin e Zi, ku jeton një shumicë boshnjake myslimane. Banorët e zonës prej kohësh pretendojnë për diskriminim institucional dhe margjinalizim nga autoritetet në Beograd.
“Incidenti i fundit nuk është vetëm për një rektor, por për mënyrën si pushteti qëndror e trajton këtë komunitet,” tha për Reuters një aktivist civil nga Novi Pazari.
Presidenti Vuçiq, në një lidhje të drejtpërdrejtë televizive me median pro-qeveritare Informer, u përfshi gjithashtu në polemikë me Rasim Ljajiqin – politikan i njohur lokal dhe kryetar i klubit të futbollit Partizan – duke sugjeruar se liderët lokalë duhet të marrin përgjegjësi për tensionet. Ai mohoi që emërimi i rektorës apo ndërhyrja e policisë të kenë qenë të motivuara politikisht.(INA)
