Tensione të reja në VLEN: Mesut Bajrami nga Alternativa shpall kandidaturë të pavarur në Kumanovë
Në skenën politike shqiptare në Kumanovë po shfaqen zhvillime të reja që pasqyrojnë tensionet e brendshme brenda koalicionit VLEN dhe partisë Alternativa. Njëri prej funksionarëve kryesorë të Alternativës në këtë qytet, Mesut Bajrami, ka shpallur kandidaturën e tij të pavarur për këshilltar komunal.
Përmes një deklarate publike, Bajrami ka theksuar se vendimi i tij është rezultat i pakënaqësive me gjendjen aktuale politike dhe, siç thotë ai, me diskriminimin që u bëhet shqiptarëve në Kumanovë.
“Të nderuar miq, shokë dhe dashamirë, duke parë gjendjen aktuale politike dhe diskriminimin ndaj shqiptarëve të Kumanovës, unë, Mesut Bajrami, dua t’ju njoftoj se sot shpall kandidaturën time për këshilltar komunal në Kumanovë, si kandidat i pavarur”, deklaroi ai.
Bajrami u shpreh se objektivi i tij është që të ofrojë shërbim të drejtëpërdrejtë për qytetarët shqiptarë, duke përdorur të gjitha kapacitetet e tij.
“Synimi im është t’u shërbej qytetarëve shqiptarë me të gjitha kapacitetet e mia intelektuale, politike dhe humane. Njëkohësisht, kërkoj përkrahjen tuaj me votë, për të më dhënë mundësinë që t’ua kthej besimin në mënyrën më të mirë të mundshme. Ju meritoni më shumë”, theksoi Bajrami.
Ky zhvillim shihet si një sinjal i qartë i përçarjeve të brendshme brenda Alternativës në Kumanovë, por edhe i krisjeve më të gjera që po shfaqen në koalicionin opozitar VLEN. Pas largimit të disa figurave nga strukturat qendrore dhe vendore, tashmë edhe kandidimi i pavarur i një funksionari të rëndësishëm lokal e bën më të dukshme krizën politike brenda këtij fronti opozitar.
Përçarjet e ditëve të fundit tregojnë se uniteti i Alternativës dhe kohezioni i VLEN-it janë në pikëpyetje serioze, duke vënë në diskutim perspektivën e koalicionit në zgjedhjet lokale që po afrohen. Flaka Media
