Tërhiqet Mickoski: Badenteri nuk preket!

Kryeministri Hristijan Mickoski, është pyetur sot, lidhur me deklaratat e ministrit të drejtësisë, Igor Filkov, i cili ka deklaruar se ndoshta ka ardhur koha të shqyrtohet badenteri.

Mickoski ka thënë se Badenteri është pjesë e Marrëveshjes së Ohrit dhe të Kushtetutës.

“Marrëveshja e Ohrit është përmbushur plotësisht dhe është mbyllur dhe kjo është temë e kryer dhe e mbyllur. Ajo që përfaqësonte problem thelbësor dhe institucional dhe ajo ishte balancuesi, siç e dini, ne kemi bërë ligj, ligji për përfaqësim të drejtë, I cili krahas përkatësisë etnike do të ketë komponentë e cila do të vlerësoj sipas kualitetit, kompetencës e kështu me radhë”, ka deklaruar Mickoski.

Pas deklaratës së Igor Filkov, ministrit të Drejtësisë në Maqedoninë e Veriut, për mundësinë e rishikimit të shumicës së Badenterit, Bujar Osmani, nënkryetar i BDI-së dhe kandidat aktual për kryetar të Çairit, reagoi fuqishëm në profilin e tij në Facebook.

Filkov në intervistën për të përjavshmen Focus tha:

“Shpresoj që deri në kohën kur të publikohet kjo intervistë, Kuvendi do ta ketë përfunduar tashmë punën e tij të brendshme dhe nuk do të lejojë që të krijohet një boshllëk ligjor. Por nëse kjo nuk ndodh, atëherë po abuzohet përdorimi i shumicës Badenterit. Nëse po, atëherë ndoshta është koha të mendohet për nevojën e rishikimit të saj. Maqedonia duhet të ecë përpara.”

Reagimi i Osmanit thekson shqetësimin për të ardhmen e të drejtave të shqiptarëve:

“Kjo konfirmon se plani për shpërbërjen e Marrëveshjes së Ohrit po zbatohet hap pas hapi,” shkruan Osmani.

Ky reagim vjen në një moment kur debatet për Badenterin dhe mekanizmat e garantimit të barazisë etnike janë në qendër të politikës maqedonase, duke reflektuar tensionet rreth ruajtjes së të drejtave të komunitetit shqiptar.

Reagoi edhe Aleanca për Shqiptarët e cila shprehu shqetësim të thellë për deklaratën e Igor Filkov, ministrit të Drejtësisë, për mundësinë e rishikimit të shumicës së Badenterit. Ky mekanizëm është themelor për garantimin e përfaqësimit të komunitetit shqiptar në institucionet e Maqedonisë së Veriut.

“Deklarata e ministrit është e papranueshme dhe përbën kërcënim të drejtpërdrejtë për të drejtat dhe përfaqësimin e shqiptarëve. Pas heqjes së Balancuesit, tani kërkohet edhe heqja e Badenterit, duke vënë në rrezik barazinë etnike dhe parimet demokratike,” thekson Aleanca për Shqiptarët.

Aleanca gjithashtu akuzon koalicionin qeverisës VLEN:

“VLEN vazhdon të jetë mbështetës i çdo nisme antishqiptare të qeverisë jolegjitime. Me heshtjen dhe pranimin e veprimeve të tilla, VLEN po rrezikon interesat dhe të drejtat e shqiptarëve, duke e legjitimuar politikën diskriminuese të këtij pushteti.”

Aleanca për Shqiptarët kërkon nga të gjitha institucionet dhe faktorët ndërkombëtarë:

“Të ndërhyjnë dhe të ndalojnë këtë ofensivë kundër përfaqësimit të shqiptarëve, sepse çdo tentativë për të hequr mekanizmat e garantimit të barazisë etnike është një sulm ndaj demokracisë dhe stabilitetit të vendit.”

Aleanca për Shqiptarët do të qëndrojë e palëkundur në mbrojtje të të drejtave, përfaqësimit dhe barazisë së komunitetit shqiptar në Maqedoninë e Veriut, reaguan nga Aleanca për Shqiptarët e Arben Taravarit. 

Ish-ministri i Drejtësisë, Krenar Lloga, ka reaguar ashpër ndaj deklaratës së ministrit aktual të Drejtësisë, Igor Filkov, i cili ka thënë se “ka ardhur koha për ta reviduar mekanizmin e Badenterit”, transmeton Flaka Media

“Çfarë pushteti kriminel është ky i vLEN–VMRO DPMNE-së! Pasi kontestuan çdo gjë që ka të bëjë me shqiptarët – dygjuhësinë, Balancuesin, regjistrimin e popullsisë, ofendimet e përditshme, zeroizimin e punësimeve, funksionarë minimalë ose pa asnjë peshë – shkuan aq larg, sa edhe vetë pushteti kriminal i Millosheviqit do t’ua kishte zili. Tash duan të rishqyrtojnë edhe votimin e dyfishtë, gjegjësisht të ashtuquajturin Badenter”, tha Lloga.

Ai shtoi se gjuha e qeverisë aktuale që nga fillimi ka qenë “destabilizimi”, por se falë pjekurisë së faktorit politik shqiptar dhe ndërhyrjes së faktorit ndërkombëtar është shmangur eskalimi i provokimeve.
“Konflikti i vitit 2001 u ndal falë përpjekjeve edhe të faktorëve ndërkombëtarë, të cilët sollën pakon minimale të të drejtave të shqiptarëve. Të kesh iluzionin fashist se je i zgjedhur për të ridefinuar shtetin sipas shijeve subjektive është naivitet dhe amoralitet në variantin më të mirë, e dashakeqësi në variantin më të keq”, theksoi Lloga.

Sipas tij, veprimet e qeverisë gjatë një viti janë një “koleksion i qartë” që dëshmojnë përpjekjet për të përçarë shtetin dhe për ta ndarë atë sipas interesave të ngushta politike.
“Maqedonia e Veriut është shtëpia jonë. Është e të gjithëve ne dhe jo e ca oligarkëve apo udbashëve të djeshëm të maskuar si politikanë apo biznesmenë”, nënvizoi ai.

Lloga i bëri thirrje ministrit të Drejtësisë që të tërheqë menjëherë deklaratat dhe të kërkojë falje:
“Ministri i paaftë e dembel, që nuk ka lëvizur asgjë për një vit, duhet urgjentisht të tërheqë këto fjalë dhe të kërkojë falje. Ndryshe, ai është lajmëtar ogurzi për popullin dhe shtetin tonë. Ky ministër duhet thirrur në Prokurori, sepse po sfidon rendin kushtetues dhe ligjor të shtetit që aksidentalisht e ka bërë Ministër të Drejtësisë”, përfundoi ish-ministri i Drejtësisë. Flaka Media