Tre futbollistë lëndohen në fundjavë dhe humbin ndeshjet me Kosovën
Ka filluar grumbullimi i futbollistëve te Kombëtarja e Kosovës për ndeshjet e muajit nëntor. “Dardanët” do t’i zhvillojnë dy ndeshjet e fundit në grupet e Ligës së Kombeve, ku takohen me Rumaninë në udhëtim dhe presin Lituaninë. Megjithatë ndeshjet e fundjavës në klubet evropiane nuk kanë qenë më të mirat sa i përket futbollistëve të Kosovës.
Tre futbollistë të cilët ishin në listën e Franko Fodës për dy ndeshjet e këtij muaji kanë pësuar lëndime me skuadrat e tyre. Mbrojtësi i majtë Leart Paqarada ka pësuar lëndim në fitoren e Kellnit 1-0 ndaj Grojter Furtit dhe në minutën e 68-të u zëvendësua. Lëndime kanë pësuar edhe dy futbollistët ofensivë, Milot Rashica me fanellën e Beshiktashit dhe Bersant Celina me fanellën e gjigantit suedez AIK.
Mësohet se sulmuesi në top formë me skuadrën e tij CSKA Sofja, Zymer Bytyqi është ftuar nga Franko Foda. Bytyqi ka kapur formën dhe në tre sfidat e fundit ka shënuar një gol dhe ka asistuar në dy të tjerë me fanellën e gjigantit bullgar.
Megjithatë pritet të ketë edhe lojtarë të tjerë që do të përfshihen në listë për të zëvendësuar Bersant Celinën dhe Leart Paqaradën.
Foda ka publikuar edhe listën e futbollistëve që janë në pritje dhe ata janë: Ilir Avdyli, Mustafë Abdullahu, Lirim Kastrati, Mirlind Kryeziu, Leard Sadriu, Art Smakaj, Altin Zeqiri,Drilon Hazrollaj, Astrit Selmani, Muhamed Hyseni. /Telegrafi/
