VLEN emëron ekonomisten Ibraimi në krye të ndërmarrjes publike “Tregu” në Likovë – paralajmëron reforma dhe transparencë
Pas dorëheqjes së Gzim Kadriut, i cili u largua nga pozita pas daljes së partisë së tij nga koalicioni qeverisës, ndërmarrja publike “Tregu” në Komunën e Likovës ka emëruar drejtuesen e re. Znj. Ibraimi, përfaqësuese e koalicionit VLEN, do të udhëheqë këtë institucion me synimin për t’i dhënë një drejtim të ri punës dhe shërbimeve ndaj qytetarëve përcjell INA
Në paraqitjen e saj të parë, Ibraimi theksoi se përparësi e menjëhershme do të jetë një analizë e detajuar e gjendjes aktuale në ndërmarrje – nga struktura organizative, deri te kapacitetet njerëzore dhe nevojat urgjente të shërbimeve publike. Ajo paralajmëroi ristrukturim të brendshëm, optimizim të shpenzimeve, identifikim të burimeve alternative të financimit dhe vendosjen e një transparence më të madhe në proceset vendimmarrëse dhe financiare.
“Fokusin do ta vendosim në profesionalizëm dhe efikasitet. Për mua nuk ka rëndësi përkatësia politike, por interesi publik dhe funksionimi i qëndrueshëm i ndërmarrjes. Qytetarët presin shërbime cilësore dhe kjo do të jetë prioriteti im kryesor,” u shpreh Ibraimi.
Ajo shtoi se do të mbështetet fuqishëm në bashkëpunimin me institucionet vendore dhe se ka mbështetjen e kryetarit të Komunës së Kumanovës, Maksim Dimitrievski, për realizimin e objektivave të përbashkëta.
Emërimi i Ibraimit vjen në një moment kur qytetarët e Likovës presin përmirësime të dukshme në ofrimin e shërbimeve publike, rritje të përgjegjshmërisë institucionale dhe rikthim të besimit te ndërmarrjet lokale.(INA)
