VLEN me retorikë opozitare: BDI dhe aleatët, 23 vite gënjeshtra – Mjaft më!
“BDI dhe aleatët e saj e kanë shndërruar politikën në një lojë logosh dhe ngjyrash. Herë shpallen Front Evropian, herë Front Kombëtar, sot me emrin AKI – çdo ditë një identitet i ri, vetëm e vetëm për ta fshehur krizën e brendshme dhe dështimet 23-vjeçare,” thuhet në reagimin e VLEN.
Sipas këtij koalicioni opozitar, ndryshimi i vazhdueshëm i logove dhe ngjyrave nuk mund ta fshehë realitetin.
“Ky është tregues i qartë i një partie që nuk e di kush është dhe ku po shkon. Një ditë ngjyra e gjelbër, ditën tjetër e kaltër, por në çdo rast, qytetarët i shohin të njëjtët njerëz, me të njëjtat dështime dhe me të njëjtin korrupsion,” thekson VLEN.
Ata përkujtojnë edhe largimet e partive nga radhët e BDI-së dhe aleancës së saj:
“Nga ‘Fronti’ i tyre po largohen një e nga një: u largua partia turke, e cila ka qenë forcë serioze me rreth 20 mijë qytetarë mbështetës; u largua Menduh Thaçi, dhe ky është vetëm fillimi. Forcat që në të kaluarën janë përplasur rëndë mes vete, sot përpiqen të fshihen nën një logo të përbashkët, por qytetarët e dinë mirë se kjo është vetëm një fasadë.”
Nga ana tjetër, VLEN thekson unitetin e vet politik:
“VLEN asnjëherë nuk ka qenë më unik, asnjëherë më i bashkuar. Këtë e dëshmojmë çdo ditë, në çdo vendim dhe mbi të gjitha me kandidaturat tona të përbashkëta, që janë shpresa e qytetarëve për ndryshim.”
Sipas këtij koalicioni, ndryshimi nuk matet me ngjyra apo logo, por me rezultate:
“Vlera nuk maten me logo e ngjyra të ndërruara, por me veprime konkrete për qytetarët. 23 vite në pushtet, e tash mendojnë se duke ndërruar ngjyrat dhe emrin mund ta fshijnë historinë e mashtrimeve. Por shqiptarët nuk harrojnë: korrupsionin, pazaret dhe zhgënjimet nuk i mbulon asnjë logo e re.”
Deklarata përfundon me mesazhin e qartë për zgjedhjet e tetorit:
“Tetori do të ketë vetëm një fitues dhe ai është VLEN!”
