Vrasësi i ushtarit Muaremi ende është në arrati
Policia është ende në kërkim të të dyshuarit të parë për vrasjen e pjesëtarit të Ushtrisë, Agim Muaremi, i cili u qëllua me disa plumba nga pistoleta më 11 korrik në fshatin Batincë të Shkupit. Nga MPB konfirmojnë se personi që ka qëlluar është identifikuar, por ende nuk është gjetur dhe arrestuar, shkruan Alsat.
“Më 17 korrik në Prokurorinë Themelore Publike Shkup është ngritur kallëzim penal me procedurë të shpejtë kundër XH.M. (25 vjeç) për kryerjen e veprës penale “Vrasje” dhe kundër B.P. (35 vjeç) për kryerjen e veprës penale “Vrasje” sipas nenit 123 lidhur me nenin 22 të Kodit Penal. Personi B.P. është privuar nga liria dhe iu është dorëzuar organeve gjyqësore, ndërsa XH.M. ende nuk është i kapshëm për organet e rendit dhe po ndërmerren masa për gjetjen e tij”, thonë nga MPB.
Përveç këtyre dy personave të dyshuar për vrasjen e Muaremit, në ngjarje janë përfshirë edhe dy persona të tjerë që ende nuk janë as identifikuar e as gjetur nga policia. Muaremi u vra më 11 korrik në Batincë, pasi katër persona me makinë Opel Astra ia ka bllokuar lëvizjen automjetit në të cilin ndodhej ushtari, dhe pastaj personi i parë i dyshuar ka qëlluar pesë herë ndaj Muaremit dhe vajzës së tij.
Vajza e tashmë të ndjerit, së bashku me familjarë e kanë dërguar Muaremin në spital, ku edhe ka ndërruar jetë. Si policia ashtu edhe prokuroria për Alsat thonë se hetimi për këtë rast është në rrjedhë e sipër dhe po punohet për gjetjen e personit të parë të dyshuar, por edhe të dy personave të tjerë që gjithashtu janë në arrati./ Alsat.mk
