Xhud Belingam ndihmon Realin në merkaton për futbollistin e Premier Ligës

Real Madridi pritet që të jetë shumë i ngarkuar gjatë afatit kalimtar veror. Ndonëse shanset e tyre për të transferuar Alfonso Dejvies nga Bajern Munihu po veniten, e njëjta situatë nuk vlen edhe për Trent Aleksander-Arnold.

Ky i fundit do të mbetet pa kontratë në fund të sezonit, që do të thotë se brenda pak javësh, ai mund të nis zyrtarisht bisedimet me klubet tjera. Real Madridi është në mesin e atyre klubeve dhe para se të ndodhë kjo, ai tashmë po merr këshilla nga bashkëvendësi i tij Jude Bellingham, sipas mediumit spanjoll “Relevo”.

Belingami po punon shumë në këtë drejtim për ta bindur Aleksander-Arnold që t’i bashkohet atij tek Real Madridi, duke i thënë të mos nënshkruajë kontratë të re tek Liverpulli.  Në këtë mënyrë, ai do të mbetej lojtar i lirë në treg dhe ‘Los Blancos’ do të ishin në gjendje ta transferonin si lojtar të lirë.

Real Madridi është i etur për të siguruar shërbimet e tij, sidomos pas lëndimit të rëndë të Dani Karvahallit dhe paraqitjeve të Lukas Vazkezit.