Zhernovski: Qeveria s’ka legjitimitet etnik, zgjedhjet e parakohshme janë të paevitueshme
Ish-kryetari i Komunës së Qendrës dhe ish-zëvendësministër i Punëve të Jashtme, Andrej Zhernovski, vlerëson se pas ngjarjeve të fundjavës së kaluar është bërë e qartë se zgjedhjet e parakohshme parlamentare janë të pashmangshme në Maqedoninë e Veriut.
Në një status në rrjetet sociale, Zhernovski shkruan se shumica qeverisëse është “vite dritë larg” sigurimit të shumicës së Badenterit, gjë që sipas tij është tregues i një krize të thellë politike.
“Sasia e madhe e deputetëve që fitoi VMRO-DPMNE nuk do të thotë asgjë nëse nuk ka cilësi për menaxhimin e proceseve politike. Shifrat në dukje stabile në Parlament nuk nënkuptojnë edhe sistem stabil,” thekson ai.
Zhernovski kujton se vendimet për të cilat nevojitet shumicë e cilësuar tashmë po trokasin në derë, ndërsa Brukseli po humbet durimin për shkak të pamundësisë së zgjedhjes së Avokatit të Popullit.
“Shtuna e dështuar në Kuvend tregoi se na pret periudhë e pafunksionalitetit dhe se janë lëkundur ‘themelet stabile’ për të cilat kryeministri pretendonte se i kishte ngritur. Nëse këto janë themelet për të ardhmen, atëherë është e qartë se me këtë qeveri, Maqedonia nuk ka asnjë të ardhme,” shkruan Zhernovski.
Ai shton se edhe pse pushteti po përgatitet për zgjedhjet lokale, sytë e liderit të VMRO-DPMNE-së, Hristijan Mickoski, tashmë janë kthyer kah zgjedhjet e parakohshme parlamentare.
