Imerlije Saliu: Çfarë hipokrizie! BDI po përvetëson meritat për Medresenë
Deputetja e VLEN-it, Imerlije Saliu, ka reaguar ashpër ndaj deklaratave të ish-mimistrit të Jashtëm të BDI-së, Bujar Osmani dhe eksponentëve të BDI-së lidhur me zgjidhjen ligjore për statusin e Medresesë.
“Çfarë hipokrizie!” – shprehet ajo, duke e cilësuar reagimin e Osmanit për këtë çështje si “një përpjekje të ulët për të përvetësuar meritat e të tjerëve” dhe një dëshmi se “mashtrimi dhe manipulimi politik janë bërë standard në diskursin e BDI-së”.
Sipas saj, gjatë qeverisjes së kaluar, BDI përdori Medresenë si mjet elektoral, solli një vendim anti-kushtetues para zgjedhjeve dhe më pas, me ndikim në Gjykatën Kushtetuese, e rrëzoi vetë atë vendim.
“VLEN veproi! Hartuam ligj të mirëfilltë, e miratuam në Qeveri dhe shumë shpejt do ta votojmë edhe në Kuvend. Ky është dallimi midis propagandës dhe punës konkrete”, tha Saliu.
Ajo theksoi se çdo përpjekje për të relativizuar këtë arritje është “tallje me dijen, me Medresenë, me besimin dhe me të ardhmen e qindra të rinjve tanë”.
“Kur të votohet ligji në Kuvend, çfarë do të thoni më pas? Të paktën heshtni para së vërtetës”, përfundoi ajo.
