Ibrahimi: Kjo që bëri Arben Taravari quhet mashtrim
Kryetari i Alternativës dhe njëri nga liderët e koalicionit VLEN, Zeqirija Ibrahimi, ka komentuar marrëveshjen e Arben Taravarit me Ali Ahmetin për të garuar edhe me lista të përbashkëta.
“Ajo që e kemi supozuar, sot u përdëftua. Për fat të keq dhe me keqardhje e them se z. Arben Taravari ka mashtruar. Gjatë gjithë kohës thoshte se ka vendim që do të shkojë me lista të ndara për këshilltarë komunalë dhe se ajo është çështje e mbyllur, madje ky i a.q. vendim i tij “i pakthyeshëm” ishte arsyeja që ai më në fund doli nga VLEN-i.
Por, ashtu siç supozohej, ai sot ka vendosur që të shkojë me lista të përbashkëta me BDI-në, me Ali Ahmetin, me Musa Xhaferin e me Blerim Bexhetin, për të cilët nuk ka lënë gjë pa thënë në publik e në takime interne. Kaq prej konsistencës së tij politike.
Dhe, keqardhja ime nuk është vetëm në përdorimin e termin “mashtrim”, që flet keq dhe flet shumë për profilin e një politikani, por më shumë më dëshpëron derexheja e skenës politike të shqiptarëve në RMV. E gërditshme deri në çfarë shkalle po i shtrydh Ali Ahmeti njerëzit për të shpresuar ndonjë sukses politik.
Sidoqoftë, zgjedhjet po vijnë dhe jam i bindur se secili do ta marrë atë që e ka merituar, siç thotë populli “çfarë të mbjellësh, do të korrësh”, ka shkruar Ibrahimi.
