Zbulime spektakolare në kufi: cigare, ilaçe, diamantë dhe vaj ulliri
Zyrtarët e Doganës së Maqedonisë së Veriut kanë kapur disa raste kontrabande në pikat kufitare të vendit, duke sekuestruar mallra të ndryshme – nga pajisje industriale e farmaceutike, deri te produkte ushqimore dhe cigare.
Kabllo me unaza diamantësh
Në pikën kufitare Bogorodicë, në një veturë Audi A8 me targa kosovare, u gjetën 18 bobina kabllo me unaza diamantësh për prerjen e mermerit. Malli ishte fshehur në bagazh dhe ka vlerë rreth 664 mijë denarë. Pronarëve u është ngritur procedurë penale.
Ilaçe
Në kufirin Tabanoc, ekipet mobile doganore zbuluan 63 paketime me barna dhe materiale mjekësore (sirupe, tableta, shiringa, spraj etj.) në një veturë me targa gjermane, të drejtuar nga një shtetas maqedonas.
Objektiva për kamera dhe pajisje ngarkese
Në Deve Bair, në një veturë me targa bullgare, doganierët gjetën 4 objektiva profesionalë për kamera ARRI Signature Prime, me vlerë rreth 4.8 milionë denarë. Vetëm detyrimet fiskale të shmangura kapnin mbi 1.1 milion denarë.
Në të njëjtën pikë kufitare, në një veturë me targa austriake, u kapën edhe 60 rripa ngarkese, të fshehur në bagazh.
Cigare
Në Dojran dhe Bogorodicë u zbuluan disa raste kontrabande me cigare. Në total u sekuestruan 47 komplete cigare të markave Marlboro, Karelia, OME, LM dhe PS, të fshehura në kamionë dhe vetura. Vlera e tyre arrin në mijëra denarë, ndërsa doganat e shmangura janë të konsiderueshme.
Vaj ulliri
Në kufirin e Mexhitlisë, një shtetas slloven tentoi të fusë ilegalisht 472 kanaçe me gjithsej 153 litra vaj ulliri, të fshehura në veturë. Vlera e mallrave arrin në 60 mijë denarë.
Pajisje për telefona
Në Deve Bair, në një kamion me targa bullgare, doganierët gjetën 250 maska për iPhone, të cilat u sekuestruan.
