Ish-ministri i Jashtëm i Ukrainës, Dmytro Kuleba, me mesazh mbështetës për Bujar Osmanin në Çair
Ish-Ministri i Punëve të Jashtme të Ukrainës, Dmytro Kuleba, ka dërguar një video-mesazh të fuqishëm dhe emocional në mbështetje të kandidaturës së Bujar Osmanit për kryetar të Komunës së Çairit.
Në mesazh, Kuleba shprehu mirënjohje për popullin maqedonas dhe përkrahjen e dhënë ndaj Ukrainës gjatë pushtimit rus, duke vlerësuar edhe rolin e Osmanit si ministër i jashtëm i Maqedonisë së Veriut dhe kryesues i OSBE-së.
„Ne, ukrainasit, jemi mirënjohës për përkrahjen tuaj. Përgjithmonë do ta kujtojmë që gjatë tri viteve të fundit kombi juaj krenar qëndroi pranë Ukrainës“, theksoi Kuleba.
Duke folur për Osmanin personalisht, ai u shpreh:
„Bujar Osmani është miku im që e udhëhoqi diplomacinë tuaj dhe kryesoi OSBE-në. Ai është politikan i njohur dhe jam i sigurt se e respektoni po aq sa e respektoj edhe unë.“
Ministri ukrainas e përshkroi Osmanin si njeri të përkushtuar dhe të ndershëm:
„Jam i bindur se do t’ju shërbejë me integritet dhe përkushtim. Ai e do Maqedoninë, ju do juve, i do qytetet dhe fshatrat tuaja. Është njeri që meriton besim, diçka që e kam kuptuar në momentet më të vështira të pushtimit.“
Kuleba theksoi se përvoja dhe rrjeti ndërkombëtar i Osmanit janë burim i paçmuar për zhvillimin lokal dhe shfrytëzimin e fondeve evropiane. Në fund, ai përcolli përshëndetje për qytetarët e Çairit, duke iu uruar fat dhe stabilitet, me mesazhin se miqësia mes popujve ndërtohet përmes liderëve që kuptojnë përgjegjësinë dhe solidaritetin.
