Presidentja Osmani për Nënë Terezën: Trashëgimia e saj është thirrje për secilin prej nesh
Presidentja e Republikës së Kosovës, Vjosa Osmani, ka kujtuar figurën dhe veprën e Shën Terezës në ditën e lindjes së saj.
“Nga fshati i vogël i Letnicës, ku dëgjoi thirrjen hyjnore, në Sheshin ‘Shën Pjetri’ në Vatikan e pastaj në çdo anë të botës, Nënë Tereza i dha zë të varfërve, të sëmurëve dhe të harruarve, duke lënë pas një trashëgimi të pakrahasueshme bamirësie dhe humanizmi”, ka shkruar Osmani.
Ajo shtoi se rrugëtimi i Nënë Terezës ka frymëzuar miliona njerëz dhe se veprat e saj janë kujtesë e fuqisë së dashurisë dhe solidaritetit.
“Trashëgimia e saj është një thirrje për secilin prej nesh: të jemi pranë të tjerëve, të dhurojmë dashuri e shpresë dhe të ndërtojmë një botë më të drejtë e më paqësore”, përfundoi Presidentja Osmani. (INA)
