Trondit Buxhovi: 600 vrasje pa autor, prandaj gjyqi në Hagë është i domosdoshëm
Historiani Jusuf Buxhovi ka deklaruar se themelimi i Dhomave të Specializuara në Hagë ishte i pashmangshëm, për shkak të mungesës së hetimeve serioze për krimet e luftës në Kosovë.

Në një intervistë për emisionin “Off the Record” në A2 CNN, ai kujtoi se gjykata të ngjashme u ngritën në të gjitha shtetet e ish-Jugosllavisë, megjithëse shpesh u kritikuan si të padrejta ose të motivuara politikisht. “Gjykata e Hagës dhe Dhomat e Specializuara nuk kanë zbritur nga qielli. Ishte e domosdoshme që secili shtet i rajonit të hetonte krimet e luftës”, tha Buxhovi.
Sipas tij, vetëm në periudhën nga hyrja e NATO-s në Kosovë deri një vit më pas, u kryen mbi 600 vrasje, shumica e të cilave nuk janë zbardhur kurrë. “Janë vrarë 106 aktivistë të LDK-së, 116 pjesëtarë të UÇK-së – përfshirë disa komandantë – si dhe rreth 400 qytetarë nga komunitetet minoritare. Shumë raste mbeten ende pa autor”, theksoi ai.
Buxhovi shtoi se, ndryshe nga Kosova, Serbia, Kroacia dhe shtetet e tjera të rajonit kanë zhvilluar gjykime, ndonëse shpesh të kontestuara. “Në Kosovë, mungesa e hetimeve vendore krijoi nevojën për Dhomat e Specializuara, të cilat megjithatë shpesh perceptohen si qërim hesapesh politike”, u shpreh historiani.
