Sali: Ligji për përfaqësim adekuat do të zbatohet edhe pa masa ndëshkuese

Edhe pse projektligji për Përfaqësim të Drejtë dhe Adekuat nuk parasheh masa ndëshkuese, zëvendëskryeministri Bekim Sali siguron se ai do të zbatohet në praktikë.

I pyetur mbi mungesën e sanksioneve dhe efektin që kjo mund të ketë në garantimin e përfaqësimit të drejtë, Sali theksoi se përgjegjësia bie mbi institucionet shtetërore, konkretisht mbi Qeverinë.

“Garantues për zbatimin e këtij ligji jemi ne. Ligji për Përfaqësim Adekuat do të respektohet dhe do të zbatohet në administratën shtetërore”, deklaroi ai.

Sali sqaroi se ligji parasheh hartimin e akteve nënligjore, të cilat do të mundësojnë ndërhyrje konkrete në raste të nevojshme. Gjithashtu, ai bëri të ditur se do të krijohet një trup koordinues, i cili do të udhëhiqet nga zëvendëskryeministri i parë, për të mbikëqyrur zbatimin e ligjit.