Ali Ahmeti pas aktgjykimit në Hagë: Vendim i padrejtë dhe thellësisht zhgënjyes
Kreu i Bashkimit Demokratik për Integrim, Ali Ahmeti, ka reaguar pas aktgjykimit të Dhomave të Specializuara të Kosovës në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit. Ahmeti e ka cilësuar vendimin si të padrejtë dhe ka bërë thirrje për maturi e unitet.
Lideri i Bashkimit Demokratik për Integrim, Ali Ahmeti, ka reaguar pas vendimit të Dhomave të Specializuara të Kosovës në Hagë në rastin ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Në reagimin e tij, Ahmeti e ka cilësuar aktgjykimin si “të padrejtë dhe thellësisht zhgënjyes”, duke theksuar se në këto momente duhet të ruhet qetësia dhe uniteti.
“Vendimi i sotëm ndaj Hashim Thaçit, Jakup Krasniqit, Kadri Veselit dhe Rexhep Selimit është një vendim që e konsideroj të padrejtë dhe thellësisht zhgënjyes”, ka shkruar Ahmeti.
Ai ka bërë thirrje që zhvillimet e fundit të mos shndërrohen në burim tensionesh apo përçarjesh.
“Në këto momente të rënda, bëj thirrje për maturi dhe unitet. Nuk duhet të biem në asnjë grackë që synon të krijojë tensione, përçarje apo të njollosë luftën çlirimtare të popullit në Kosovë”, ka deklaruar lideri i BDI-së.
Ahmeti në reagimin e tij është ndalur edhe te roli i UÇK-së dhe qëllimi i luftës së saj.
“UÇK-ja lindi si përgjigje ndaj shtypjes dhe luftoi për lirinë e Kosovës”, ka theksuar ai.
Sipas Ahmetit, pretendimet e dikurshme për trafikim organesh, të cilat për vite me radhë ishin lidhur me UÇK-në dhe drejtuesit e saj, nuk u shndërruan në akuza në procesin gjyqësor në Hagë.
“Pretendimet e dikurshme për trafikim organesh, që rënduan për vite mbi UÇK-në dhe drejtuesit e saj, nuk u shndërruan në akuza në këtë proces”, ka shkruar Ahmeti.
