Mickoski: Investim i ri i kompanisë gjermane “Kromberg dhe Shubert”, lajm i rëndësishëm për ekonominë tonë

Kryeministri Hristijan Mickoski paralajmëroi investim të ri të kompanisë gjermane “Kromberg dhe Shubert”, 2.000 vende të reja të punës dhe prodhim të pjesëve për gjigantin gjerman të automobilave “Audi”.

“Sot, do të publikojmë edhe një lajm të madh dhe të rëndësishëm për ekonominë tonë – investim të ri të kompanisë gjermane ‘Kromberg dhe Shubert’, 2.000 vende të reja të punës dhe prodhim të pjesëve për gjigantin gjerman të automobilave ‘Audi’. ky është lajm i rëndësishëm për ekonominë tonë, por edhe më i rëndësishëm për qytetarët, pasi pas çdo vendi të punës qëndron një mundësi e re, siguri më e madhe për familjet, shpresë e re dhe jetë më e mirë”, ka shkruar Micskoski në profilin e tij në Fejsbuk.

Kjo, shtoi, është programi ynë, këto janë qëllimet tona dhe kështu e ndërtojmë ardhmërinë.

“Me punë, investime dhe rezultate konkrete. Derisa ne hapim vende të reja të punës dhe krijojmë mundësi, programi i opozitës, në vend se me projekte dhe zgjidhje, është i mbushur me shkatërrim, gënjeshtra dhe obstruksione politike. Dallimi ekziston dhe çdo ditë bëhet gjithnjë e më i dukshëm. Ne vazhdojmë të luftojmë për çdo vend të punës, për jetë më të mirë dhe për ardhmërinë tonë të përbashkët”, thotë kryeministri Mickoski në publikimin në “Fejsbuk”.